လစ်ဗာပူးလ်ရဲ့ ကမ်းလှမ်းခြင်းကို ခံခဲ့ရတဲ့ နာပိုလီ ကွင်းလယ်လူ (စီးရီးအေ သတင်းများ)

ဒီတစ်ခါ မှာတော့ စက်တင်ဘာလ ၁၃ ရက်နေ့ အထိ ရရှိထားသမျှ စီးရီးအေ သတင်းတွေကို ဖော်ပြပေးသွားမှာ ဖြစ်ပါတယ်။

လစ်ဗာပူးလ်ရဲ့ ကမ်းလှမ်းခြင်းကို ခံခဲ့ရတဲ့ နာပိုလီ ကွင်းလယ်လူ 

လစ်ဗာပူးဟာ ပြီးခဲ့တဲ့နွေရာသီ အပြောင်းအရွှေ့မှာ နာပိုလီ ကွင်းလယ်လူ အယ်လ်ဂျစ် အယ်လ်မက်စ်ကို ခေါ်ယူဖို့ အတွက် ကမ်းလှမ်းခဲ့ကြောင်း သိရပါတယ်။ လစ်ဗာပူးလ် အနေနဲ့ ပြီးခဲ့တဲ့ အပြောင်းအရွှေ့ရာသီမှာ အသင်းရဲ့ ကွင်းလယ်လူတွေကို လက်လွှတ်ခဲ့ရတာကြောင့် ကွင်းလယ်ပိုင်းကို ပြန်လည် အင်အားဖြည့်တင်းဖို့ နောက်ဆုံး အချိန်အထိ ကြိုးစားခဲ့ပါတယ်။ 

ဒါပေမယ့်လည်း အသင်း အနေနဲ့ ကျေနပ်လောက်စရာ အင်အားဖြည့်တင်းမှုမျိုးကို ပြုလုပ်နိုင်ခဲ့ခြင်း မရှိဘဲ လက်ရှိဘောလုံးရာသီကို စတင်ဖြတ်သန်းနေရပြီ ဖြစ်ပါတယ်။ လစ်ဗာပူးလ် ကမ်းလှမ်းခဲ့တဲ့ ကစားသမားတွေထဲမှာ စီးရီးအေ လက်ရှိ ချန်ပီယံ နာပိုလီရဲ့ ကွင်းလယ်လူလည်း ပါဝင်ခဲ့ပြီး ပြောင်းရွှေ့ကြေး ယူရိုသန်း (၃၀) အထိ ပေးချေသွားဖို့ ပြင်ဆင်ခဲ့ပါတယ်။

ဒါပေမယ့်လည်း နာပိုလီ ကတော့ အယ်လ်မက်စ်ကို ရောင်းချဖို့ ဆန္ဒမရှိခဲ့တာကြောင့် အပြောင်းအရွှေ့က အောင်မြင်ခဲ့ခြင်း မရှိကြောင်း သိရပါတယ်။ 

ပေါ့ဘာကို ကာကွယ်ပေးလိုက်တဲ့ အေးဂျင့်

 တားမြစ်ဆေး စစ်ဆေးမှုမှာ ကျရှုံးခဲ့တဲ့ ပေါလ် ပေါ့ဘာနဲ့ ပတ်သက်လို့ ကစားသမားရဲ့ အေးဂျင့်က ကာကွယ် ပြောကြားလိုက်ပါတယ်။ ပေါ့ဘာဟာ ဂျူဗင်တပ်စ်နဲ့ အူဒီနီးစ်တို့ ကစားခဲ့တဲ့ စီးရီးအေ ပွဲစဉ်အပြီး ဆေးစစ်မှုခံယူတဲ့ နေရာမှာ ဆေးကျခဲ့တာ ဖြစ်ပါတယ်။ 

အဆိုပါပွဲမှာ ပေါ့ဘာ အနေနဲ့ လုံးဝပါဝင်ကစားခြင်း မရှိခဲ့ဘဲ ပွဲအပြီးမှာ အခုလိုမျိုး ရလဒ်ထွက်ပေါ်ခဲ့တာ ဖြစ်သလို လက်ရှိမှာတော့ ပွဲကစားခွင့် ပိတ်ပင်ခံထားရပြီ ဖြစ်ပါတယ်။ ပေါ့ဘာရဲ့ ဖြစ်ရပ်နဲ့ ပတ်သက်လို့ အေးဂျင့် ရာဖယ်လာ ပီမင်တာက ကျွန်တော်တို့ အနေနဲ့ တန်ပြန်ဆေးစစ်မှု ရလဒ်တွေကို စောင့်ဆိုင်းနေကြောင်း၊ အဲ့ဒီမတိုင်ခင်အထိ ဘာမှမှတ်ချက်ပေးမှာ မဟုတ်ဘဲ သေချာတာ တစ်ခု ကတော့ ပေါ့ဘာ အနေနဲ့ စည်းမျဉ်းစည်းကမ်းတွေကို ရည်ရွယ်ချက်ရှိရှိ ချိုးဖောက်ခဲ့တာမျိုး မရှိကြောင်း ပြောကြားသွားခဲ့ပါတယ်။

ရိုးမား ပရိသတ်တွေရဲ့ ကြိုဆိုမှုကြောင့် စိတ်လှုပ်ရှားခဲ့ရကြောင်း လူကာကူပြော 

ရိုးမား တိုက်စစ်မှူး ရိုမယ်လူ လူကာကူဟာ အသင်းပရိသတ်တွေရဲ့ ကြိုဆိုမှုက သူ့ကို စိတ်လှုပ်ရှားစေခဲ့ကြောင်း ဖွင့်ဟ ပြောကြားသွားခဲ့ပါတယ်။ လူကာကူဟာ ပြီးခဲ့တဲ့ နွေရာသီ အပြောင်းအရွှေ့မှာ ချဲလ်ဆီး ကနေ ရိုးမားကို တစ်ရာသီ အငှားနဲ့ ပြောင်းရွှေ့လာခဲ့တာ ဖြစ်ပြီး ရောမမြို့ခံ ပရိသတ်တွေက သူ့ကို လှိုက်လှိုက်လှဲလှဲ ကြိုဆိုခဲ့ပါတယ်။ 

အဆိုပါ ဘယ်လ်ဂျီယံ လက်ရွေးစင် တိုက်စစ်မှူးဟာ အင်တာမီလန်နဲ့ အတူ စကူဒက်တို ချန်ပီယံဆု ကိုလည်း ဆွတ်ခူးနိုင်ခဲ့ဖူးပြီး စီးရီးအေ အတွေ့အကြုံရှိ ကစားသမားလည်း ဖြစ်ပါတယ်။ 

ရိုးမား ပရိသတ်တွေရဲ့ ကြိုဆိုမှုအပေါ် လူကာကူက ကျွန်တော် ရောမမြို့ကို ရောက်လာချိန်မှာ စောင့်နေတဲ့ လူအုပ်ကြီးကြောင့် ကောင်းတဲ့ အတွေးတွေပဲ ရှိခဲ့ကြောင်း၊ ဘောလုံးကစားနေချိန်မှာ ဒါမျိုးကို ခင်ဗျားလည်း တွေ့ကြုံချင်မှာ ဖြစ်ကြောင်း၊ ဒီလိုမျိုး စိတ်ခံစားချက်တွေ အတွက်ပဲ အသက်ရှင်နေရကြောင်း ပြောကြားသွားခဲ့ပါတယ်။

 

●●●

နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS

အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်

ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , တွစ်တာ , အင်စတာဂရမ် and ယူကျု့ဘ်.